काठमाडौं- मधेशी जनअधिकार फोरमका अध्यक्ष उपेन्द्र यादवले सरकारसँग वार्ता गर्न आफूहरू तयार रहेको बताउनुभएको छ । उहाँले वार्ताबाट समस्याको समाधान गर्न आफ्नो सङ्गठन तयार रहे पनि वार्ताअघि गृहमन्त्री कृष्णप्रसाद सिटौलाले राजीनामा दिनुपर्ने शर्त अगाडि सार्नुभयो ।
‘वार्ता सफल बनाउन गृहमन्त्रीले राजीनामा दिनैपर्छ’- उहाँले भन्नुभयो- ‘राजीनामा नदिएसम्म वार्ता हुनै सक्दैन भन्ने चाहिँ होइन ।’ सरकारले आफूहरूलाई वार्तामा बोलाए पनि वार्ताका लागि औपचारिक पत्र भने अहिलेसम्म नपठाएको जानकारीसमेत यादवले दिनुभयो ।
अन्तरिम संविधानप्रति असन्तुष्टि जनाएर आन्दोलन गरिरहेका मधेशी जनअधिकार फोरम, तराईमा सशस्त्र द्वन्द्व जारी राखेको तराई जनतान्त्रिक मुक्ति मोर्चा लगायतका सङ्गठनलाई सरकारले मङ्गलबार औपचारिकरूपमा वार्तामा बोलाएको थियो । मन्त्रिपरिषद्को विशेष बैठकले यी पक्षलाई औपचारिक रुपमै वार्तामा बोलाउने निर्णय गरेको हो ।
अध्यक्ष यादवले सरकारलाई वार्ताको वातावरण बनाउन आग्रह गर्दै मधेशीहरूको मागलाई सम्बोधन गर्न प्रधानमन्त्रीलाई अनुरोध गर्नुभयो ।
फोरमले तराईलाई स्वायत्त राज्य घोषणा गर्नुपर्ने, मधेशीलाई राज्यसत्तामा समानरूपले सहभागी गराउनुपर्ने लगायतका माग राख्दै आन्दोलनमा उत्रिएको छ । स्वससे

जनवरी १, २००७ मा नेपाली समाज क्षेत्रीय समिति मुसाफाहाले आयोजना गरेको फुटबल कार्यक्रममा प्रमुख अतिथि यूएईका लागि कार्यबाहक राजदूत मोहनकृष्ण श्रेष्ठले देउराली खबर पत्रिकाको पहिलो नमूना अंक विमोचन गर्नुभयो ।

अनेसास यूएई च्याप्टरका सभापति बालचन्द्र पोख्रेल प्रधान सम्पादक रहनु भएको उक्त पत्रिका यूएईबाट पहिलो पटक पाक्षिक रुपमा प्रकाशन हुन थालेको हो । यूएई.मा छरिएर रहेका नेपालीहरु जोसँग इन्टरनेट इमेलको राम्रो सुविधा छैन त्यहाँ देउराली पाक्षिक खबर पत्रिका पु-याउने र इमेल इन्टरनेटबाट विश्वका अन्य नेपालीहरुलाई यूएईमा भएका  र अन्य देशका समचारहरुसहित उपलब्ध गराउने उद्देश्यले प्रकाशन भएको देउराली निकट भविश्यमानै वेभ साइटबाट पनि प्रकाशनमा ल्याउने जानकारी प्रधानसम्पादक पोखरेलले दिनु भएको थियो ।

साथै प्रधानसम्पादक पोखरेलले प्रवासमा हुने गरेका गतिविधि घटनाहरु, कथा कविता, प्रवासी जीवनको अविस्मरणिय क्षण, आदि उपलब्ध गराइदिन र नमूना अंक पढिसकेपछि प्रतिक्रिया दिनका लागि पनि अनुरोध गर्नु भएको थियो । उपस्थित सम्पूर्ण नेपालीहरुले बडो चाखका साथ पत्रिका लिनुभएको थियो र पत्रिका पढिसकेपछि प्रतिक्रिया दिने प्रतिबद्धता व्यक्त गर्नु भएको थियो ।

 यूएईमा रहेका नेपालीहरुको पूरानो संस्था नेपाली समाज यूएईमा विगत लामो समयदेखि रहेका विवादहरु छलफल र बहसमार्फत समाधान गर्दै अन्ततः एकीकृत भएको छ। यूएईका लागि कार्यबाहक राजदूत मोहनकृष्ण श्रेष्ठको विषेश पहल र विभाजित दुबै समूहबीच लामो छलफलपछि नेपाली समाज यूएई नयाँ वर्ष २००७ सालको सुरुवातसँगै रामेश्वर साहको अध्यक्षतामा १९ सदस्यस्य केन्द्रीय समिति चयन भएको छ ।

नयाँ कार्यसमितिमा मधु आले प्रथम उपाध्यक्ष, राजेन्द्र देवकोटा द्वितीय उपाध्यक्ष, यमलाल शर्मा पंगेनी महासचिव, शंकर ज्ञावाली सचिव, रविन्द्र पौडेल कोषाध्यक्ष, दीपक आचार्य सहकोषाध्यक्ष, कृष्ण न्यौपाने संवाद सचिव, चन्द्र चेम्जोङ सहसम्वाद सचिव तथा सदस्यमा प्रज्वल श्रेष्ठ, लक्ष्मण सापकोटा, दामोदर नेपाल, जनकराज शर्मा, ललितमान राना, तर्कबहादुर कटुवाल, तुलसी तामाङ, होम रानाभाट, प्रवीणराज घिमिरे र सुनिल पंगेनी रहनुभएको छ ।

नयाँ वर्ष तथा बकरिद इदको पावन अवसरमा मुसाफाह क्षेत्रीय समितिले आयोजना गरेको फुटवल कार्यक्रमको फाइनलको दिनमा कार्यबाहक राजदूत मोहनकृष्ण श्रेष्ठले नेपाली समाज यूएई एकीकरण भएको र जुन २००५ मा स्थापना भएको केन्द्रीय तदर्थ समिति आजैको दिनबाट भङ्ग भएको घोषणा गर्नु हुँदै नयाँ साल २००७ को आफ्नो ब्यक्तिगत तथा दुतावासको तर्फबाट शुभकामना ब्यक्त गर्नु भएको थियो ।

उक्त कार्यक्रममा आफ्नो मन्तब्यमा नवनियुक्त अध्यक्ष रामेश्वर साहले भन्नुभयो- ‘हामीले सम्पूर्ण यूएईबासी नेपालीको हितलाई ध्यानमा राखेर एकापसका मनमुटावलाई हटाई एकता गरेका छौं । यसमा प्रमुख भूमिका निभाउनु हुने कार्यबाहक राजदूत श्रेष्ठ तथा दूतावास परिवारलाई धेरै-धेरै धन्यवाद दिन चाहन्छु  । उहाँलै सम्पूर्ण प्रवासी नेपालीहरुको साथ पाएमा नेपाली समाज केन्द्रीय समिति यूएई नयाँ जोस र जाँगरका साथ अगाडि बढ्न सक्ने छ भन्दै सम्पूर्ण प्रवासी नेपालीहरुलाई नेपाली समाज केन्द्रीय समितिको छातामूनी रहन अनुरोध गर्नु भएको थियो ।